MENECER

Türkiyədə ali təhsilini başa vurduqdan sonra Azər bir türk şirkətinin baş təmsilçisi kimi Rusiyaya yollanır. Rusiyada və Almaniyada biznes layihələr həyata keçirir. Özünün “Alyans Qrup” şirkətini təsis edir və direktor vəzifəsində çalışır.

Tələbəlik illərində ictimai-siyasi proseslərdə aktiv iştirak edən Azər 2010-cu ildə Azərbaycana və siyasətə qayıtmağa qərar verir. Siyasi fəaliyyətə Real Hərəkatında İdarə Heyətinin üzvü kimi başlayır və sonra partiya quruculuğu prosesinə rəhbərlik edir. 2018-2019-cu illərdə Respublikaçı Alternativ Partiyasının ilk Məclisinə sədrlik edir.

SİYASƏTÇİ

Onun partiya Məclisinin sədri olduğu dövrdə Məclis Azərbaycan və Avropa Birliyi arasında strateji əməkdaşlığa dair sazişlə bağlı mövqe sənədini qəbul edir. Bundan başqa ayrı-ayrı komitələrdə konseptual sənədlər işlənib hazırlanır.

Biznesin öyrətdiyi idarəetmə təcrübəsi, çeviklik və menecment vərdişləri siyasi təşkilatçılıq işlərində də öz rolunu oynayır. 2018-ci il 28 mayda Azər Qasımlı Bakının mərkəzində Cümhuriyyətin 100 illik yubileyinə həsr edilmiş böyük yürüşün əsas təşkilatçılarından olur.

Hər zaman cəsarətli və birxətli siyasi mövqeyi ilə seçilən Azər Qasımlı 2019-cu ildə müstəqil siyasətçi kimi fəaliyyət göstərməyə qərar verir.

SADƏCƏ AZƏR

Azər üç övlad atasıdır. “Mənim arzum var. Övladlarım Azərin, Dəniz, Altan və bütün balalarımız böyüyəndə Avropa və Amerikaya həsədlə baxmasınlar. İnsanına dəyər və rifah verən dövlətdə yaşamağın qürurunu hiss etsinlər”. Siyasətdə də, həyatda da prinsiplərinə sadiq olan Azər hər zaman övladlarına dürüst və ləyaqətli insan olmağı öyrədir.